Rebbieħ tal-Premju Nazzjonali tal-Ktieb
Fid-daqqa u l-ħin, tinfetaħ tieqa u titfaċċa poeta. Jew tiftaħlek il-bieb ta’ darha u tagħmillek sinjal biex tgħaddi.
Jew tistenniek wara l-kantuniera u kif tasal teħodlok idek bil-kalma u minflok tħallik għaddej dritt iddawwarlek id-direzzjoni u tikser għan-naħa tagħha minflk tibqa’ sejjer. Ma nafx jekk hux il-poeti kollha jagħmlu hekk imma Nadia Mifsud iddaħħlek fil-privat mhux daqstant għall-gost esibizzjonista daqskemm biex turik li l-affarijiet mhux dejjem huma kif jidhru.
https://edizzjoniskarta.wordpress.com/nadia-mifsud-kantuniera-l-boghod/
Bormla
(pèlerinage)
fil-qalba hemm leħen nannti jaħtaf il-vokali ta’ toroq tfuliti hemm nannti liebsa l-gejxa hemm il-ġara ta’ xagħarha bbliċjat u l-qliezi mxammra tpeċlaq waħedha ma’ radju jtextex mal-barmil ifexfex tobrox l-istess biċċa bankina erbgħin sena u fuqhom hemm l-Immakulata Kunċizzjoni ittrakkata ma’ elf faċċata il-qtates magħluba jħaxknu t-telqa tagħhom mal-għekiesi tat-turġien jilagħqu t-traskuraġni titmiegħek fi truf l-isqaqien naxra ħwejjeġ tal-ħabba gozz pariġġ leħen ta’ mara jitpastaż wara ħasira mtertqa imdendla bl-addoċċ riħa taqsam ta’ stuffat wara l-knataz u s-serraturi jitmaħmħu l-fatati ħdejn ix-Xgħajra ta’ Bormla mhux bogħod wisq minn fejn ommi kienet tixtri ċ-ċiċri u l-ħut nieqaf niggosta qarmuċa ċaċċaruna – xedaq beraħ u libsa perpura ibandlu żewġ toppini f’pika mal-mina ma’ kull żaqżiqa jgarawli botta sinna businna bajda ħalib oqgħod fejn se nqiegħdek meta mmut niġi għalik
nadia mifsud
Mill-ġabra kantuniera ’l bogħod (Edizzjoni Skarta, 2015).
ibażwruni għajnejkom
(lil uliedi)
ibażwruni kultant għajnejkom jistħarrġu 'l wiċċi jfittxu fuq truf xufftejja risposti għall-biżibilju mistoqsijiet li tixtiequ tistaqsuni u ma tafux kif li tixtiquni nwieġeb imma mhux dejjem ikolli aptit ibażwruni għajnejkom iqandlu veritajiet itqal minnkom li aħna l-kbar lanqas inlissnu ma nazzardaw tbażwruni tħobbuni minn tarf sa tarf u lura anki meta kliemi jiċħadkom
nadia mifsud
Mill-ġabra kantuniera ‘l bogħod (Edizzjoni Skarta, 2015).
Montdevergues
(wara l-film ta’ Bruno Dumont, Camille Claudel, 1915)
nixtieq nista’ nnewwaħ u nwaħwaħ bħar-riħ nheżżeż bħalu l-ħġieġ ta’ dal-ħabs li qafluni fih fatat għax qalu li ruħi tmekkħet meta missejt miegħek u ġegħelthom jistħu tiftakar, qalbi? kif nista’, għidli, ma nobogħdokx? ħabbejtek wisq u int ħadtli kollox ħfintni kollni ħannintni bi kliemek għaġintni bħat-tafal kif nista’, għidli, ma nibbiesx ma nsirx tal-ġibs imħabbla f’dil-ħolma kerha twila tletin sena? għejejt u jdejja ma nafx x’naqbad nagħmel bihom int ġa ilek li tlaqt jien għadni hawn – waħdi – nissielet biex ma jiblagħnix dal-ġenn ta’ madwari inħobbok u nisħtek fl-istess nifs nistenna li jiġi l-baħħ iżarmani
nadia mifsud
Mill-ġabra kantuniera ‘l bogħod (Edizzjoni Skarta, 2015).
sdf
anki l-kliem spiċċa tpaħpaħ – jitmeżmżu t-tfal jarawh jitbeżlaq ma’ geddumek jindifen fid-daqna folta isir tmeċmiċ iżerżqu jdejhom f’tiegħi jiġbduni 'l hinn minn għajnejk ħuġġieġa minn snienek immermrin u dufrejk kulur il-ġmied nammetti jiġrili li anki jien nitħassrek u nistkerrħek fl-istess ħin nipprova nispjegalhom – forsi ħadd qatt ma pprova jifhmek forsi ħadd qatt ma ħares lejk sewwa tgħid fejn huma ommok u missierek? fejn hi dar tfulitek? x’jismek? kemm jista’ għandek żmien? narak tiżmanġa kuljum ftit aktar fl-istess kantuniera tliet toroq 'il bogħod nitbaxxa daqsxejn kemm niskarta 'l għajnejk inżerżaqlek ġiex ċekċikiet f’żaqq il-beritta imbagħad intaptap tnejn ras il-kelb u nkompli għaddejja b’affarija inqandel il-basktijiet tax-xiri mal-kuxjenza suppost nadifa sdf – sans domicile fixe skorċa dagħwa ferita żewġ pari ngwanti bojod ġew jiżgumbraw il-bankina wara l-lejl li ġie jaħtaf tgedwidek wara li s-sirda meximxitlek ħaddejk bħalma ġa kienet meximxitlek ħolmietek xi ħadd ġabar il-kutra safra riħa ta’ bewl u birra għajnejn uliedi qed jistaqsuni x’sar minnu l-kelb naħseb naf imma nippreferi nxengel rasi u niskot
nadia mifsud
Mill-ġabra kantuniera ‘l bogħod (Edizzjoni Skarta, 2015).