Varjazzjonijiet tas-Skiet

Rebbieħ tal-Premju Nazzjonali tal-Ktieb

L-ebda skiet mhu bħal ieħor. Hemm is-skiet ta’ kmieni filgħodu u dak ta’ tard billejl. Hemm skiet artab u komdu li jqarreb u jwaħħad, li jisboq bi sbuħitu kull tentattiv ta’ kliem. Hemm skiet kennieni li jagħmlilna tajjeb nitgeżwru fih meta kollox madwarna jsir wisq. Kultant, imma, is-skiet jaf ikun oħxon ċpar, ħarba, fdal jew baħħ. Jaf jistona, idarrab, iħalli f’ħalqna togħma ta’ mrar. Kultant inkunu aħna li neħtieġu s-skiet, drabi oħra jinfirex fina bla ma nfittxuh, xi minndaqqiet jiġi impost fuqna u sta għalina naraw x’naqbdu nagħmlu bih.

F’din il-ġabra ta’ poeżiji, Nadia Mifsud tirrakkonta skitijiet differenti, mis-skiet l-iktar intimu sa dak li saħansitra jista’ jissejjaħ esperjenza kollettiva, bħal meta d-dinja nħafnet mill-pandemija u ma konniex nafu x’naqbdu ngħidu (iktar).

U int, qatt doqt is-skiet? Qatt żfintu? Taf tgħid x’kulur(i) għandu?

Varjazzjonijiet tas-Skiet huwa ktieb magħmul bl-idejn minn Kotba Calleja. Din il-pubblikazzjoni ġiet megħjuna mill-Fond Nazzjonali tal-Ktieb (Kunsill Nazzjonali tal-Ktieb).

https://edebooks.eu/bookshop/varjazzjonijiet_tas-skiet/

Tieqaf l-irxiexa
u l-belt dlonk tieħu bixra oħra.
Riħa ta’ ġebel imxarrab.
Ħemda umda
li xejn ma jħarbat
ħlief it-tinwiħa
ta’ qattusa ċkejkna
imkebba tregħida waħda
ma’ koxxa ta’ bieb.
Ħoss ta’ ilma jqattar,
tal-katusi jtektku.
L-ispralli jitqanżħu taħt saqajna.
(Xi darba nirrakkuntalek
il-logħob ta’ dari
fil-kantina ta’ nannti,
id-daħk sfrattat
mill-fatati mistħajla.)
F’għajnejk ukoll hemm
mistura mitt ħrafa.
Ma’ kull pass li mmiddu,
spallejna jitħabbu —
aptit ta’ żifna.
Nefħa riħ tbandal
il-fanali mdendla
minn naħa għall-oħra tat-triq,
u magħhom,
fuq iċ-ċangaturi leqqiena,
jitbandal id-dawl —
artab daqs leħnek.